Luke 13

Phendukani Funa Libhubhe

1Bakhona ababelapho kulesosikhathi abatshela uJesu ngamaGalile uPhilathu axuba imihlatshelo yabo legazi labo. 2UJesu waphendula wathi, “Kambe likhumbula ukuthi amaGalile lawo ayeyizoni okudlula amanye amaGalile ngoba bahlupheka kanjalo na? 3Ngithi, hatshi! Kodwa, ngaphandle kokuba liphenduke lani lonke lizabhubha. 4Kumbe labo abalitshumi lesificamibili abafayo baze bawelwe ngumphotshongo waseSilowani – licabanga ukuthi babonile okudlula bonke ababehlala eJerusalema na?

5Ngithi, hatshi! Kodwa, ngaphandle kokuba liphenduke lani lonke lizabhubha.”

6Wasebatshela umzekeliso lo: “Indoda ethile yayilesihlahla somkhiwa ohlanyelwe esivinini sayo, yasisiyacinga izithelo kuwo, kodwa yaziswela.

7Yasisithi kuleyondoda eyayigcina isivini, ‘Sekuyiminyaka emithathu ngilokhu ngisiza ngizofuna izithelo kulesisihlahla somkhiwa kodwa ngingatholi lutho. Sigamule! Senzani kambe siqeda ukudla emhlabathini?’

8“Indoda yaphendula yathi, ‘Mnumzana, ake usiyekele nje okomnyaka owodwa, kengisihlakulele kuhle ngithele umvundiso. 9Uma sizathela ngomnyaka ozayo, kuzabe kulungile! Uma singatheli, usungasigamula.’ ”

Owesifazana Oyisilima Uyasiliswa NgeSabatha

10Ngelinye iSabatha uJesu wayefundisa kwelinye isinagogi, 11khonapho kulowesifazana owayengenwe ngumoya wamenza isilima okweminyaka elitshumi leficamibili. Wayegogekile esehluleka ukuhlala aqonde. 12Kwathi uJesu embona wambizela phambili wathi kuye, “Mama, usukhululwe ekugogekeni kwakho.” 13Wasebeka izandla zakhe phezu kwakhe, masinyane nje owesifazana watshwaphuluka waqonda wasedumisa uNkulunkulu.

14Umbusi wesinagogi wacunuka ngoba uJesu wayesilise ngeSabatha wathi ebantwini, “Ziyisithupha izinsuku zokwenza umsebenzi. Ngakho libokuza lizosiliswa kulezozinsuku, hatshi ngeSabatha.”

15INkosi yamphendula yathi, “Lina bazenzisi! Kalikwenzi yini lonke lapha ukuthi mhla weSabatha likhulule inkabi yenu loba ubabhemi esibayeni liyokunathisa na? 16Manje-ke owesifazana lo oyindodakazi ka-Abhrahama, obebotshwe nguSathane okweminyaka eminengi, elitshumi leficamibili, lithi kangakhululwa yini ngeSabatha kulokho obekumbophile?”

17Wathi esekutshilo lokhu bayangeka bonke ababephikisana laye, ikanti abantu babethokoza ngazo zonke izinto ezimangalisayo ayezenza.

Umzekeliso Wentanga Yemastadi Lowemvubelo

18UJesu wasebuza wathi, “Umbuso wezulu ufana lani na? Kambe ngiwulinganise lani?

19Unjengentanga yemastadi umuntu ayithatha wayihlanyela esivandeni sakhe. Yamila yakhula yaba yisihlahla, izinyoni zemoyeni zahlala emagatsheni aso.”

20Waphinda wabuza wathi, “Ngiwufanise lani kambe umbuso kaNkulunkulu na? 21Unjengemvubelo ayithatha owesifazana wayixuba lempuphu enengi yabila yagcwala inhlama yonke.”

Umnyango Omncinyane

22UJesu wasehamba engena emadolobheni lemizini efundisa, ejonge ukuya eJerusalema.

23Omunye wambuza wathi, “Nkosi, ngabalutshwana kuphela yini abazasindiswa na?” Wathi kubo, 24“Zamani ngamandla ukuthi lingene ngomnyango omncinyane, ngokuba ngiyalitshela ukuthi abanengi bazazama ukungena kodwa bazakwehluleka. 25Angavele aphakame umninindlu avale umnyango lizakuma phandle liqoqode lincenga lisithi, ‘Mnumzana, sivulele umnyango.’ “Kodwa uzaphendula athi, ‘Kangilazi, kangazi njalo ukuthi livela ngaphi.’

26“Lapho lizakuthi, ‘Sadla lawe, sanatha sonke, njalo wafundisa emigwaqweni yakithi.’

27“Kodwa uzaphendula athi, ‘Kangilazi, njalo kangikwazi ukuthi livela ngaphi. Sukani kimi, lonke lina benzi bobubi!’

28“Kuzakuba khona ukukhala lapho lokugedla amazinyo, nxa selibona u-Abhrahama, lo-Isaka loJakhobe labo bonke abaphrofethi embusweni kaNkulunkulu, kodwa lina ngokwenu lilahlelwe ngaphandle. 29Abantu bazavela empumalanga lasentshonalanga, kanye lasenhla laseningizimu, bathathe izindawo zabo edilini embusweni kaNkulunkulu.

30Ngempela bakhona labo abangabokucina abazaba ngabokuqala, labangabokuqala abazaba ngabokucina.”

UJesu Uzwela IJerusalema Usizi

31Kulesosikhathi abanye abaFarisi beza kuJesu bathi kuye, “Suka lapha uye kwenye indawo. UHerodi ufuna ukukubulala.”

32Waphendula wathi, “Hambani liyotshela ikhanka lelo lithi, ‘Ngizawaxotsha amadimoni, ngisilise abantu, lamuhla lakusasa langosuku lwesithathu ngize ngiyiphethe indima yami.’

33Loma kunjani ngisamele ngiqhubeke ngohambo lwami lamuhla lakusasa langelanga elilandelayo – ngokuba ngempela kakho umphrofethi ongafela ngaphandle kweJerusalema!

34“Hawu, Jerusalema, Jerusalema, wena obulala abaphrofethi ukhande ngamatshe labo abathunywe kuwe, sekukanengi ngiloyisa ukuqoqa ndawonye abantwabakho, njengesikhukhukazi siqoqa amatsiyane aso ngaphansi kwamaphiko aso, kodwa wawulokhu ungathandi! 35Khangela, usutshiyelwe indlu yakho isilunxiwa. Ngiyalitshela kalisayi kungibona futhi lize lithi, ‘Ubusisiwe lowo ozayo ngebizo leNkosi.’ ”